Folöldin koma í heiminn hvert af öðru og allt hefur gengið vel fram til þessa. Það var létt yfir Kirkjubæingum um síðustu helgi þegar Fluga gamla lallaði sér heim með nýjasta afkvæmið til að sýna - rauðblesótta hryssu undan Hróðri frá Refsstöðum. Þar er komin alsystir hinnar þekktu Fjólu frá Kirkjubæ. Henni hefur þegar verið gefið nafn og heitir Eva. Í gær komu síðan tveir hestar rauður og brúnn undan Fána frá Kirkjubæ, stórir, reistir og myndarlegir. Skoðið myndir hér neðar.

Það er komið vor í Kirkjubæ, einstaklega hlýtt og gott veður alla daga og allur gróður að taka við sér. Fyrstu folöldin eru komin. Dreyrrauður hestur kom fyrstur, fallegur foli undan Mídasi frá Kaldbak og Alparós frá Kirkjubæ. Í gær kom síðan folald númer 2, rauðblesótt hryssa undan Hróðri frá Refsstöðum og Dögg frá Kirkjubæ, sjá mynd hér neðar.

Fáni frá Kirkjubæ er efnilegur klárhestur í eigu Kirkjubæjarbúsins. Hann er undan Dyn frá Hvammi og afburðahryssunni Flugu frá Kirkjubæ og þannig af miklu klárhestakyni í Kirkjubæ. Systur hans eru m.a. Freisting, Spurning, Festing og Fjóla - allt hátt dæmdar kynbótahryssur. Þá má nefna að móðurbræður Fána eru Seifur og Strákur sem báðir voru í fremstu röð töltara á heimsleikum hér um árið. Gert er ráð fyrir að Fáni verði til afnota í Kirkjubæ í sumar en stefnt er með hann í dóm í vor.

Um síðustu helgi var haldin sérstök sýning og mót í Mánahöllinni í Reykjanesbæ. Sýningin var til heiðurs og í minningu ungs pilts, Kristjáns Hlynssonar sem lést af slysförum á síðasta ári. Kristján var eljusamur og dugandi hestamaður. Langafi hans var Sigurður Haraldsson í Kirkjubæ. Kirkjubæingar settu upp heiðurssýningu af þessu tilefni. Húsfyllir var í Mánahöll og sýningin öll hin glæsilegasta og hressileg stemmning í anda Kristjáns Hlynssonar.